Tūrei 28 o Mei 2024

Te Poari Matua o Te Kōhanga Reo

Kei ngā Kōhanga Reo mai i Te Hiku o Te Ika ki Murihiku, whakawhiti atu ki Wharekauri.

He pānui tautoko tēnei nā Te Pōari Matua o Ngā Kōhanga Reo i te kaupapa Toitū Te Tiriti ka tū a tēnei Tāite, 30 o ngā rā o Mei.

He nui ngā take whakaāwangawanga i a tātou i tautoko ai Te Pōari i te whakaaro nei, ko ngā tūru Māori ka riro i ngā Kaunihera tērā, ko te whakaū i te ture whakatere whakaaetanga tērā, ko te whakakore i Te Aka Whaiora anō tērā.

Engari, ko te take i tū kaha ai ō mātou pihi, kua rāngona e tātou ka mukua te wāhanga ki Te Tiriti o Waitangi i te ture Oranga Tamariki, ka noho hauraro te mana o te tuakiri Māori i te ture rā, he motu i te mana o te whānau ki āna tamariki te hua, te mokopuna anō ki tōna whakapapa me tōna reo.

Kua nawhe tērā! Kua tae te wā!

I timata ai tō tātou kaupapa i te tohe mō te reo me ngā mokopuna. Kua roa tātou e hāpai nei i tēnei tohe. Nā reira me he mea kei te whakaaro tō Kōhanga Reo kia tautoko i te porotū a te Tāite 30th o Mei, ānei ētahi kaupapa hei whakaarotanga.

• Wānangatia te kaupapa nei ki waenga i ngā whānau o tō Kōhanga Reo, whai whakaaro ki te kaupapa o te porotū me ngā whakaaro o tō whānau. Kei ia Kōhanga te mana.
   

• Kei ia Kōhanga Reo te mana mēnā ka kati o kūaha i runga i te karanga o te rā porotū. Kua kī mai te tāhūhū, e kore to Kōhanga Reo e whakawhiwhia ki te moni hāpai tamariki mo taua rā tonu. Wānangatia te kaupapa ki o whānau.
   

• He porotū riri kore, he porotū wairua pai, he porotū whai whakaaro ki ngā mokopuna.
   

• Kei ia rohe āna anō wāhi porotū, tirohia ngā paepāpori, ki kōna kitea ai ngā whakahaeretanga.
   

He mamae poto, he oranga roa!

Toitū Te Kōhanga Reo.

Nā Te Poari Matua o Te Kōhanga Reo.